• ×

02:57 مساءً , الجمعة 16 نوفمبر 2018

القوالب التكميلية للأخبار

القصيد المنتقى لشعراء الملتقى 18

زيادة حجم الخط مسح إنقاص حجم الخط
سراب الويلان: 

الشاعرة ونه
والي خلق صُم الجبال المنيفات
والي بسط ل الآدمي هالبسيطه
إني معاد أسامحك أنت بالذات
ب أصير مجنونة خصام وسليطه
ب أبيع قلب يسهر الليل مابات
واشري ل عقلي كم كتاب وخريطه
اسافر ب فكري بلاد ومحيطات
اسج دام السالفه مستشيطه
مثل الطيور ان رفرفت ف الفضاءات
وقامت تحوم بلاهموم... ونشيطه
ب احاول اني اشتري لي مساحات
فيها جنون الشاعرة... والعبيطه
فيها حكاية بنت مجنونة أبيات
هاجوسها مخمخ على ماتحيطه
مخمخ على صوت الغلا ف الحكايات
لا غلّف المحبوب ....ورد و شريطه
الله يامجمّل شعور.... البدايات
القلب أخضر والنوايا ...بسيطه
لكن ليا من الغلا صار بسكات
حتى لسانك لو بغى الهرج خيطه
القلب مات وصاحب القلب مامات
عايش بقلب الشاعرة والعبيطه


الشاعرة ام فهد العتيبيه
الشعر عندي مثل همال الرزيم
يطيعني لامن بغيته واهتويت

احيان اجيبه غصب لو فكري عقيم
واحيان مالد النظر لو شطر بيت

ماني من اللي خاطره دايم مقيم
يشعب قرايح هاجسه علا وليت

يجيبها شامي على اللحن السقيم
ويردها بالهزل والا مستميت

العلة اللي فوق جسمه يارحيم
يهزها يعني تفننت وقويت

الله يعين اللي بجنبك يافهيم
ياعزتي له كل مااوميت وحكيت

البارحه يوم اقبل الليل العتيم
ماراح اقول اني تضايقت وبكيت

لي قوة ماهي مثل باق الحريم
اضحك واجامل لو لضحكي مابغيت

اقسى علي شوي من دمع اليتيم
واهون عليه لو تحملت وسليت

اجامل الغالين لاهب النسيم
مالي بتعكير المزاج اليا شقيت

ياشعري اللي مثل هداج الكريم
يفوح عده لاتهيضت ونويت

يطرب له السامع وباوصافه يهيم
ويبكي اليا مني من الفرقا شكيت

لاقمت اجاذبها بخطٍ مستقيم
على مدرج رحلتي يوم انتويت

قامت تدانى قدم وجهي ياعظيم
وانا من الدر المنقى ما اكتفيت

احط هذي دون هذي فالصميم
وعن الهزيل من المعاني قد عليت

وارفع اشبوحي ماتلفت بالغشيم
اللي يدور زلتي يوم ارتقيت

ماهو غرور بوصف شعري بالعديم
لاني من عدود الجزالة قد رويت


الشاعرة عيوف
مالوم القلب لو بيّح كنينه
بعد ما فارق اغلى ساكنينه !

ابوي اللي رحل من قبل اضمه
وقبل ما تلمس ايديني يدينه

انا كنت احسب انه لي بيرجع
لكنّ الموت جاء بيني وبينه !

خذاه وضاقت الدنيا بعيني
احس اني وانا حرّه / سجينه

‏" هدوء البيت " من عقبه يخوّف
غدا موحش وجدرانه حزينه

احس البيت يبكي من فراقه
ولو ينطق بيسأل عنه وينه ؟

انا وشلون ابسلى؟ كيف ابنسى؟
وش اسوي بقلبي وبْحنينه ؟

عسى دعواتي تخفف مصابي
وتغشاني من المولى سكينه

وعساه بيوم توزيع الصحايف
ضحوكٍ تمسك كتابه / يمينه !


الشاعرة الكنز المجهول
هلّت ليال العيد والقلب مجروح
والناس من حولي تباها بالافراح
استقبل الزوّار في بال مشروح
واضحك وكني داله القلب مرتاح
اخفي جروح القلب واسلي الروح
والصبر لعل الصبر للخير مفتاح
ياالعيد هاك ارسالتي واسمع البوح
عساك تلفي دارهم قبل الاصباح
ارسم لهم دمعات عيني على لوح
واشرح لهم حالي وهمي والاجراح
يالعيد انا اصبرلكن الدمع مفضوح
بيّح خفا سدي على الخد لا ساح
وانا ادري ان الدمع مافيه مصلوح
لا شك يطفي واهج القلب لا فاح
متى على الله يرحل الهم ويروح
واعيش دنيا صافيه مابها اتراح


الشاعرة بروق السراة
بأقصى حنايا الثوب طيبٍ مخبّى
يفوح ريح الطيب لا مد يمناه

الورد كنّه في كمومه معبّى
يجتاحني ذاك المعتق من أقصاه

وسجيت في حبٍ بصدري تكبّى
على النقى والعز ياطيب منشاه

حبه بقلبي من سنينٍ تربّى
خلف الضلوع العوج تنشي حكاياه

وأطيب جنان الأرض عينٍ تسبّى
وأغلى من الماس المرصع وصاياه

لبى الزمان اللي بقربه ولبّى
قلب ٍيحب القاع من تحت ماطاه

قلبٍ يحبه في مشيبه تصبّى
كنّه صغير السن يرفل بممشاه

دايم ونبضاته بصدره تنبّى
عن سره المكنون وأقصى خفاياه

وآخر كلامي تب للبعد تبّى
ضاقت فجاج الارض من حر فرقاه


الشاعرة ريف
بكره يمر الوقت وتزين الأيام
واعوض اللي ماحسبنا حسابه

نفتح شبابيك الأمل عبر الاحلام
وارمي هموم الحزن يم الغلابه

تعبت أعبر كل خافي بالاقلام
عجزت أوصل ما أبي بالكتابه

راحت حياتي كلها أحلام وأفلام
قلبي تلوع واشتكى من عذابه

تعبت من كثر الهواجس والأوهام
صارت بعيني كل الأشياء تشابه

انا تجرعت الحسايف والأسقام
حسبي عليه الوقت ساعة غدابه

يلايمين الـــقلـب والــلــه منلام
متى يزين الحظ واحضن جنابه

انا بـحبه مغـرمه حـد الإجرام
أن زاد في بعده بيدي مصابه

من غيرتي فكرت ابادر بلاعدام
والله أحبه حب مغرم صبابه


الشاعرة بروق بدوية
هاض القصيد وفز قلبي لطاريه
والليل يطربني وزانت مساريه

وتسابقت كل المعان الجديده
اخترت منها كل ماطاب واهديه

باصدق مواثيق الوفاء والمحبه
لاغلى (وطن )ياجعل شعري يوفه

محبتهٍ جاشت بصدري على الملا
صبيتها صب المتيم ....! لغاليه

ياموطني دام الغلا وسط خافقي
وف الروح مسكانه وعيني تراعيه

افْخر وانا افخر والملايين! تفتخر
لانك تروم المجد بااعلى مراقيه

اسم (السعوديه) وعالٍ مقامها
الدين منهجها.! تطبق مباديه!

سلمان حاميها من البر! للبحر
الحد يشهد له .! وفعله يكفيه

دارٍ على اسمه سميت يوم عيدها
هو عزها اللي كل صرحٍ يعليه

عسى مراديف السحايب ليا نشت
تمطر ويزهر كل شبرٍ وترويه

ياموطني من صادق اشعور قلتها
انت الغلا اللي واضحٍ في معانيه


الشاعرة المتعبة
ياوطنا في جهاتك الاربعه
تشبه فصول السنه في حلها
صيفها بحر وزوارق واشرعه
هذي جده مستحيل نملها
والشتا شمالنا يامااروعه!
فيه خضره نستظل بظلها
والربيع جنوب ربي مبدعه
يحوي اشكال الطبيعه كلها
وبينها الوسطى غدت متفرعه
كلها فصول البلاد اخت لها
كلها فصول الوطن متجمعه
ومن لها غير الوطن حضنن لها


الشاعرة مريم العتيبي
تعال نْجرب الهجران
تعال نْجرب الفرقى

واذا تقدر على النسيان
انا بساعدك ترقى

تعال نشوف وان صابت
لا تذرف عينك بحرقى

بْتلقى غيري انسانه
تبيّعك العمر سرقى


الشاعرة عوسج
نـعـمه*مــن*الـوالي*عـلي*انـساقت
‏‎وان*ربـي*اصـرفها*اعـتبرها*خـيره

‏‎الـبـنـت*مـاهـو*هـمـها*لــو*سـاقـت
‏‎وبـالـحـالتين*تــضـل*بــنـت*الـديـرة

‏‎الــــي*إذا*راقـــت*حـيـاتـك*راقـــت
‏‎مــن*طـهـر*مـعـدنها*تـحس*بـحيره

‏‎سـندك*فـي*دنـياك*لو*هي*ضاقت
‏‎لــو*ضـايـقك*مـنـها*عـلـيك*الـغـيره

‏‎تـصـبر*عـلى*عـشرتك*مـهما*لاقـت
‏‎ماتشبه*ل*(*مايا*)*وتشبه(*ميره)

‏‎أصــيــلـة*ومــهـمـا*لــمــرك*ذاقــــت
‏‎تـصـب*فــوق*الـمـر*بـعـض*الـشيره

‏‎عـذبة*حـكي*مـجنونه*لـيا*اشـتاقت
‏‎تـبـقـى*لـهـالعالم*حـديـث*و*سـيـره

‏‎والـيـوم*لــو*سـاقـت*ولــو*مـاساقت
‏‎تــــرى*الـسـعـوديه*تــضـل*أمــيـره

 0  0  1407
التعليقات ( 0 )