• ×

11:35 مساءً , السبت 28 مارس 2020

القوالب التكميلية للأخبار

"صحيفة تبوك" تنشر مجموعة منتقاة من القصائد في الحب والفقد والسعادة

زيادة حجم الخط مسح إنقاص حجم الخط
سراب الويلان 
تتميز الساحة الأدبية بمنقطة تبوك بالعديد من الشعراء والشواعر المتميزين بقصائدهم المتنوعة في الغزل والوصف والمدح، وقصائد الفخر والحماسة، والقصائد الوطنية والدينية، وفي السطور التالية تنشر "صحيفة تبوك الإلكترونية" مجموعة منتقاة من القصائد الشعرية المختلفة لـ14 شاعرًا يتحدثون خلالها عن الحب، والفقد، والوفاء، والسعادة، والجنة، وغيرها:

فعن الحب تقول الشاعرة "شوق":

الحب غيمة.. والمواصل سحايب!!
وبالعين دمعه عانقت ضيق الأنفاس!!

والقلب!! لاهبت عليه الهبايب
على غرام الشوق ومرافق اليأس

راح الخفوق وصرت كلي نهايب؟
والضيقه اللي داخل الجوف تحتاس

كني سجينن وارتكبت المصايب!!
وأقول ياقلبي عليك ألف لاباس؟

وينشد فلاح البشري:

للحزن بعيون النشامى تقارير
وللفقد بصدور الوفيين لوعات

والشوق له عند المحبين تفسير
بهيأة ندا ومغلفينه بالاهات

والصدق لو هو ذنب تاليه تقدير
والكذب لو به خير تقفاه حسرات

والسر لو قالوا لك السر بالبير
يعلم به اللي فوق سبع السماوات

العلم لاضاقت عليك المعابير
ماينفعك سرك بعد فايت فات

للصمت وقت وكانه ايصير تبرير
ترى الشجاعة نوب في بعض كلمات

سر ياقلم واكتب جزيل التعابير
للي لهم بالمنتدى زود بصمات

واكتب تحيات الوفا بالتصاوير
وارسل سلامي واحترامي بالأبيات

للمنتدى وأهله واللي له يدير
باجزل تعابير الوفا والتحيات

عروسكم ماهي سوات الغنادير
يزهابها تويتر على علم واثبات

والشاعره جرح الزمن واسمها غير
عروسها باشرافها كل الأوقات

ومن حولها ارجال تهز الطوابير
ستر البنات الوافيات العفيفات

ماني محدد والوفا للمناعير
من اي القبايل كلنا اخوان بالذات

وابعتذر منكم على كل تقصير
يا أهل الشمال اللي لكم فيه وقفات


ويقول الشاعر سيف الودعاني:

بنـزينـهم ماردّني عن مزاجي
لـو بيـننا جيـشً محمّل ذخيـره

حتى ولو دربك كثيـف الـعجاجي
واجب علي مادام عيـني بصيـره

أوصل ديـارك دام شوفك علاجـي
بوصل ديارك لو خصامي كثيـره

بنـحر خصامي لا درو عن زواجي
مزيونتن ضامر بطن من عشيره

طول الشعر وجـهً بنوره سراجي
نهـديـن مرتكـزه وتوها صغيـره


وفي قصيدة أخرى يقول الشاعر أبو فيصل:

الليل موحش والهواجس ملاعين
والحال مستوحش ولا ادري علامي

ظني لكم مشتاق شوق المساجين
اللي عيونه سيلها له وسامي

ماغير يدعي الرب رب السلاطين
ايفك حبسه والفرج والسلامي

ياعين كفي دمعتك لا تحاتين
ناسٍ فراقي عندهم ما يضامي

شوفي سما ربي وشوفي الهنا وين
وامضي على دربه وقلبك صرامي

خلي الحزن والهم ماهم مضافين
بسمك ولا يلحقك فيهم ملامي

باب السعادة دايمن بين نابين
اعرف مساحتها ينور الظلامي

واللي مجافينك يجيهم عناوين
في مقبل الايام عامٍ بعامي

أما الشاعرة شموع الدرب فأنشدت:

دواي وصلك وقلبي... وصل قلبك دواااه
جمر الفراق اشتعل.. ليتك طفيت الجمر

أهواك والناس كلن........له ميول وهواااه
وأنا عليك أمطر أشواقي......ودمعي مطر

أمسيت ضايق فؤادي...... ومتكدر مساااه
حاضر مع الناس.... وأحلام الهوا تحتضر

اللي ترجاك واستكثرت......... تسمع رجااه
تكسر خواطر............وتتظاهر بجبر الكسر

تجني عليه ببعدك..............يا كبير الجناااه
صابر وقاوم الين اتعبت..........قلب الصبر

معاك قلبي............... وتفكيري مقيد معااااه
رد اعتباري......... عسى ما شوف فيك العبر

قاضي الهوا وين ؟....دلوني طريق القضاااه
عمري قضى كيف؟..........يرجعلي بداله عمر

اللي بغى شي ياليته ...........حصل مبتغاااه
اخطر من الحب..... شوق الحب لامن خطر

الشاعر مبارك خميس

دعـيت الله يـجمعني بكم في جنة الفردوس
الـهـي خـالـقٍ نـفـسي وهـو يـعلم أمـا نـيها

أنـا مـابي مـن الـدنيا دكـاكين وفـلل وفلوس
تــرا الـدنـيا دنـيـه لــو تـغـرك فــي مـبـانيها

انــا ودي بـيوم لاتـساوت بـه جـميع الـروس
نفوز بجنةٍ عرض السماء والأرض ومن فيها

وفي قصيدة لسلمان الازوري يقول:

قلبي أسير وصابني نشوة الحب
وطعم السعادة مرّ فـ غياب الأحباب

وجرحي كبير ولا يفيده أبد طب
كنّي كـمـا طـفـلٍ وخـلوه الاقـراب

من يوم غاب اللي نخاويه فالدرب
وانا جليس وقافلٍ خلفي الباب

أذكر زماني دايم الدوم نلعب
انا وخلي بين هذيك الاطناب

وليا جلسنا قام يضحك وأنا ذب
ذب الشباب الذرب مافيه إعتاب

كنّ العسل في داخل الفم منصب
ولّا الجمال يخلي الطفل قد شاب

ما له شبيه الزين فالشرق والغرب
صورة وليفي غير عن كل الارباب

ودّي أشوفه لجل أروي ضمى القلب
وإن ما حصل صوته يكفّي ليا غاب

إغيابه خلاّ ثومة القلب تشتب
ذاب الجسم ياناس من نارها ذاب

قولوا لخلّي يمكن إنّه يقرّب
قولوله إنّي من عنا الوقت منصاب

لن كان في قربه يطيب المعذّب
لا تعذلون القلب لو ما بعد طاب

ما فيه حيله كود دعواي يارب
يافرد ياللي من ترجاك ما خاب

تلطف بخلٍ عن خليله تغرّب
وتحقق امراده وترتاح الأعصاب

وينشد مسعود القحطاني قائلًا:

(أ)أبديت باسم اللي خلق سبع الاكوان
اذكر اله الكون هو عالي الشان
عداد ما هلت من السحب امزان
وعداد من زار الحرم والمدينه

(ب)بسم النبي وأهل النبي والصحابة
محمد نبي الله وكلًا لجا به
نبغى الشفاعة منه عند المهابة
جاعل إله الكون بيضا يدينه

(ت)توارت الدنيا وعساها توّلي
وأنا مغير أعبد الهي وأصلي
محدن معي في المقبرة غير ظلي
إذا على وجهي يكبون طينه

(ث)ثلاث ظلمات تخيف القلوبي
في بطن أمك بس تبغي الهروبي
يالله يا ربي تفرج كروبي
وتشيل من قلبي هموم وضغينه

(ج)جاملت في الدنيا أصاحيب وأحباب
وأثر المجامل بعض الأحيان ينعاب
وبعض السوالف تبني أعداء وأحزاب
والأدمي يزعل إذا إنك تهينه

(ح)حطيت في قلبي غلا بعض الأجناس
والظاهر إن قلبي بيعلن لي إفلاس
بعض الاوادم مالها اليوم مقياس
تبقى على الدنيا اوادم لعينه

(خ)خاصمت خلان الرخا والمضاحك
اللي تخلوا يوم تفرد جناحك
هذا جزاتك يوم تضفي وشاحك
أهل الهوى وأهل الكذب يا أمينه

(د)دبرتها ثم أدبرت من هنيا
كنها تقلب فوق صدري حميا
يوم احسب إن قلبي تقفاه فيّا
واطرشت أذني من كلام الهوينه

(ذ)ذللت قافي تحت رحمه قصيدي
واللي بإيدي صدق ماهو بيدي
يالله ياللي كلنا لك عبيدي
نسألك طيب القلب مع طيبينه

(ر)راع الهوى تبقى عيونه تدمع
وأذنيه في حكي العواذل تسمع
لو يجتمع راع الغلا ما يجمّع
حكي العواذل منه أذني قطينه

(ز)زينت لك كل القصيد ونظمته
ياعاشقي والحب كله اقمته
وقلبك رهيف ووالله اني رحمته
وقلبي علشانك يذوق الغبينه

(س)سويت لي من رايق الكيف فنجال
في اول نهار اليوم من قدمي رجال
والضو مشبوبه ومن قدمنا جمال
وأغلب سوالفنا سواليف زينه

(ش)شمرت عن كمي وسويت لي قرص
قرص مقرص فوق صاجه مرصرص
و جنبي ثلاث رجال نباهتن حرص
محلا مذاقه مع رجال فطينه

(ص)صبيت لي شاهي على كيف كيفي
اللون أحمر فيه سكّر خفيفي
وفنجال قهوة قلت خله رديفي
حلو مذاق القرص يا ذايقينه

(ض)ضوي تبي قرص على الصاج ثاني
ولفيت لحميد الشجاع ونخاني
تترك علي القرص عشره ثواني
يا ماكلين القرص يا ماكلينه

(ط) طالت سوالفنا على القرص طالت
والشمس في كبد السموات مالت
عن ظبيه مرت علينا وقالت
ما مركم ورعي ولا شايفينه

(ظ)ظبيه عمرها تحت سته وعشرين
اغلب سوالفها عن الإبل والطين
أشهد شهادة حق مكحولة العين
من شافها أضحى يلّعن سنينه

(ع)عنقا تمشى وسط روض ربيعي
كل الذي من تحت لبسه طبيعي
و الله بصير في عباده سميعي
عشقتها عشق البحر للسفينه

(غ)غيم تهادى فوق داره فديته
عشره ليالي خص من فوق بيته
بيت الحبيب و كل ما ضقت جيته
واسمع صدى ترحيبته في رطينه

(ف)فضلًا ولا أمر دقايق دقايق
يا سامعين الشعر والبال رايق
الصدر من بعد الهنوف متضايق
والحال مابه لكن الله يعينه

(ق)قامت هواجيسي في اخر صباحي
محدن من الصحبه بيسمع صياحي
فرقا هنوف الغيد سم ذحاحي
هنوفي اللي في فؤادي سجينه

(ك)كفكفت دمعً من على الخد حوّل
في وقت ذكراها مع البال طوّل
ما هو بذاليومين والا من أوّل
تبقى الثمينة في خفوقي ثمينة

(لام) لجيت ربي عالم كل حالي
يلطف بقلبك يارفيع المعالي
واللي جرالي منك قد هو جرالي
وجروح قلبي والمشاعر دفينه

(م)ما تنزل الهامة ولا ينحني راس
الا لربي جالي كل الاعماس
الناس مختلفة من أطهار وأنجاس
وعقول بعض الناس ماهي رزينة

(ن)نوخت لي في طامن الرجم ناقه
ملحا تحقق ما تبي كسر ساقه
ملحا تربع في الفياض و عباقه
ملحا تفرق كل اب وجنينه

(هـ)هويت لي ملحا لذيذ لبنها
يا زين ثدياها وحلو بطنها
مزين مرافعها ومزين طمنها
ملحا تبيّح بالكتوم وكنينه

(و)واحمد اله الكون حمدن كثيرا
الواحد اللي بالخلايق نصيرا
عن كل شر سابقه كل خيرا
واحنا عبيده بالصدق شاكرينه

(ي)يا خالق مع جمله الخلق مخلوق
صفوة عباد الله حس و نطوق
أكرم مخاليقه وفوق على فوق
محمد نبي الله يا جاهلينه

أما الشاعر قديم الغلاااا فينشد:

طلبت الوقت يسمحلي معاك اجلس ولو ساعه
وقال ابشر وتمم لي وحذرني ولا طعته

وجيتك جيّت الملهوف وناسي كل اوجاعه
وشفت بنظرة عيونك كلامٍ ليت ماشفته

تغافل قلبي عن لمحة عيونك والعقل طاعه
وقلت الشوق من عقبك وبعدك ماتحملته

وقال البعد جبت البعد وطاري البعد وانواعه
ظروفي عنك تمنعني حداني الوقت وطاوعته

وقلت أرفق على هونك ترى الأيام خداعه
هذاك البعد مع دربه الا منك تخيّرته

ظروف الوقت ماهي فيما تشتهيه شماعه
عزاي اني في حبك ماتجاهلته ولا خنته

جلست بربكة إحساسي وقام القلب لوداعه
وعهدٍ بيننا وش عاد لوصنته وماصنته

ويقول الشاعر سعد بن نافع المظيبري:

يوم قرص الشمس هيّف على حظن الغروب
هيّفت طَرَّاقة البال زوّار وعسوس

يا وجودي وآه يا مل قلبٍ راح ذوب
منك يا بعض الطواري ويا بعض الهجوس

من يلوم أهل المحبّه عذييّن القلوب
فيه من قل المعرفة ومن جهل النفوس

والله انّي يوم اغنّي وأجر الصوت نوب
أتحاشى ونّةٍ جض منها كل قوس

كل ما هبّت لروحي من الذكرى هبوب
ودَّعتني من جروحي معنّا وآمْحَسوس

ليت بوينقٍ ورى الغيم سهّاجة دروب
امتلكها ملك صافي ومحمي وآمْحَروس

لا نويت اليمّه اللي لطاريها طروب
صوبها تقسم ورى الغيم الاغيد كل كوس

معذرة يا أهل البيئمّات وأنواع الجيوب
يا حلو في ظرف ساعة تفهّاق الرموس

في مداهيل العرب غايتي غروٍ لعوب
ما نشا في ديار لندن ولا لوس أنجلوس

مرسلٍ طيفه مع الشوق في نُودٍ لهوب
كل معلوقٍ تهزّه تودّعه آمْحَموس

لو بغيت اريّح البال ينهبه النّهوب
يطرقنّه من طواريه زوّار وعسوس

في حين أنشد الشاعر أبوتركي:

عليك بالتقوى ولاتقطع الياس
وعرف ترى ربك غفورٍ رحومي

من قبلنا ناس ومن قبلهم ناس
راحت فعايلهم سوات الحلومي

ماكنهم ركبو على قب الافراس
ولاجالها فوق البسيطة علومي

اقفت بهم سود الليالي والارمارس
ولا غير رب الخلق ربٍ يدومي

وحنا على الدنيا كماوصف عساس
ناخذ بها علمٍ ونعطي علومي

والرابح اللي كاسب علم نوماس
لا جا نهارٍ في كشف العلومي

الشاعر أحمد الشمري:

أي والله،،، إني،،، ماتمنيت،،، فرقاك
مير،،، الظروف،،، القاسية،،،، طاوعتنا

كنت احتري في رجعتك لمس يمناك
راحت،،علينا،،،والأماني،،، أخذلتنا

يافرحة،، أيامي،، أنا ،،وين،، ابلقاك
رحتي ،وباقي،،، دمعتين،،، اجرحتنا

ياكيف أعيش العمر وشلون ابنساك
حسبي على الأيام،، كيف،، أجبرتنا

وأخيرًا يقول الشاعر الملقب بـ"طيف شاعر":

ماكل شاعر صنع فكرة رسم رسمة
إيصال فكرة تتعب فكر راعيها

لوكان حاول يبروز فكرته واسمـه
يضيع فـ بداية الفكرة وتاليها

الشعر فيـه المواهب تشبه القسمة
وألقابها إنتاج ماتصنع معانيها

 0  0  857
التعليقات ( 0 )